Ngā Reanga Mokupuna

I whakawehea kia whā ngā reanga mokopuna mō tēnei mātauranga. Kia mārama ki ngā wehewehenga me ngā mahi ka taea e te mokopuna. Kia kaha te whakatipu i ngā whakahaere i waenganui i a ia me ōna pakeke, me ōna hoa.

Tuatahi, ko te wā mai i te whakairatanga o te mokopuna ki tōna whānautanga mai ki tēnei ao. Kia aroha pai ki a ia e tipu rā i roto i te kōpū o tōna kōkā, ā, kia kaha te manaaki i a rāua tahi i tēnei wā tino mīharo.

Tuarua, ko te wā tēnei o te pēpi mai i te whānautanga ki te tekau mā waru marama. Ko te wā tēnei o te pekepoho, ā, e pai ana kia takitahi te pakeke ki te pēpi, ā, kia hora te korowai aroha ki a ia, kia tau hoki te rangimārie i roto i ngā whakahaere mōna. Kia kaha te whakatipu i te hononga pono i waenganui i te kaitiaki me te mokopuna.

Tuatoru, ko te wā tēnei o ngā kōhungahunga mai i te kotahi tau ki te toru tau. Kua tīmata te mokopuna ki te hāereere. Heoi, he wā uaua tēnei mō te mokopuna nō te mea i ētahi wā e hiahia ana ia ki te whakatū i tōna mana motuhake, ā, i ētahi wā kei te pirihongi tonu ki te pakeke e kaingākautia ana e ia. Nā reira, kia ngāwari ngā whakahaere i a ia. Tautokohia ōna wawata, awhitia ia, ā, whakahautia ki te kōrero, ki te waiata, me te whakatipu i tōna hinengaro, me ōna whakaaro.

Tuawhā, ko te wā o te tamaiti i mua i te haerenga ki te kura, mai i te toru tau ki te rima tau. Kua pakari tana tū, kua whānui tōna reo, ā, kua kaha rawa atu te patapatai a tōna hinengaro. Kia kaha te tautoko i a ia. Tukuna ōna whakaaro kia kōkiri i ngā kaupapa huhua me ngā kaupapa whānui. Ārahitia ia i roto ngā mahi tahi me ngā tākaro ka taea e ia.